Сладоляд

Ясмина Дюранїн

Сладоляд

Потребне

■ 650 мл млєка (лєпше тото цо ма вецей млєчней масци)

■ 200 ґр цукру

■ мещок лимунтусу

■ 200 ґр шлаґу (думам же мож хасновац и сладку шметанку, алє сом нє пробовала)

Смаки по вибору.

Тот рецепт преверени! Кед же жадаце домашнїх обрадовац зоз смачну лакотку по горучави, шлєбодно им направце тот сладоляд. Понеже основна маса кваскава, препоручуєм же би ше додало овоцово смаки (котри мож купиц у малих фляшочкох у скоро каждим дутяну). Думам же би ше чоколадов смак вообще нє складал, алє сом нє пробовала. Найволїм додац смак ягоди, ванелиї, боровници и лимуну, а верим же ше и смак помаранчеца барз склада. Мушим пробовац!

Так треба приготовиц:

Зограц 500 мл млєка, склонїц з ринґли и додац цукер и лимунтус. Мишац же би ше цукер розпущел и охабиц най ше охладзи. Потим пресипац до даякей пластики и положиц до змаржляку.

Витрепац шлаґ зоз 150 мл млєка котри кус-покус додаваме. З ложку виберац змарзнуте млєко, класц до шлаґу и добре розмишац з миксером док нє потрошице шицке млєко. Можебуц лєпше же би млєко нє було барз, барз змарзнуте, бо кед у миски єст вельо шлаґу а змарзнути грудки млєка мали, та их нє мож добре розмишац и нє барз приємне кед ше на нїх наидзе у сладоляду.

Подзелїц пририхтану масу до телїх пластикох кельо жадаце смаки. До каждей накапкайце смак и дооообре розмишайце. Врацце до змаржаляка и нєодлуга є готови за коштованє.

Надпомнуце: Кед ше положи швижу овоц до сладоляду воно го розводнї, та ше направя кришталї ляду и нє будзе таки смачни.

Окремне дожице кед ше го понукнє зоз печену овоцу.

Ясмина Дюранїн

НАПИШЦЕ УПЕЧАТОК

Your email address will not be published.