Сечуанске месо на китайски способ

Тото єдзенє бар смачне и швидко ше го пририхтує и кед раз покоштуєце, тото єдзенє будзеце правиц кажди тидзень.

Потребне:

Пол кили билого меса

Цибуля

3 стуча цеску

3 мархви

Пол главки меншей капусти

150 ґрами змарзнутей кукурици

Кикирики

Присмачка чечней сої (ткв. „соя сос”)

Присмачка чечного чилия, лєбо гоч цо горкаве  

Ложку меду

Ложичку ориґана

Присмачки, веґета и соль

300 ґрами рискаша

Поступок:

Перше попражиц пошекану цибулю, кед омегча и пременї фарбу, додац пошекану мархву на коцочки. До того положиц порезане биле месо на коцочки и посипац дакус зоз веґету. Шицко динстовац и ище док ше динстує додац кукурицу и кикирики и 3 ложки чечней сої. Док ше вари додац ориґано и цеснок аж на концу. И пошекану капусту треба додац на концу и охабиц ище кус най ше динстує, бо так капуста  останє хрубкаца. Посолїц шицко по власним смаку, уж хто як люби.

До окремней шерпенки направиц сладко-горкаву мачанку, так же ше положи 3 ложки чечней сої, ложичку чилия и ровну ложку меду. Шицко добре розмишац же би ше зєдинєло и преляц прейґ зготовеного єдла.

Рискашу треба окреме увариц у сланей води, одцадзиц ю и послужиц як прилог ґу тому єдлу. Смачного!

Лариса Цвеїч

НАПИШЦЕ УПЕЧАТОК

Your email address will not be published.