Тоти торточки барз смачни и подзековни за родзени днї лєбо други нагоди, бо ше их бере до рукох и нє чуря вшадзи доокола. Лєгко ше их прави и у тим рецепту єст вецей читаня як роботи.
За торточки (цесто) потребне:
250 ґр муки
2-4 ложки цукру
125 ґр охладзеного марґарину
1 вайцо лєбо 2 жовчки
до пальцох солї
ванелийов цукер лєбо дакус натартей лимуновей скорки
2-3 ложки жимней води.
За фил потребне:
ванелийов пудинґ
300 мл млєка
200 мл сладкей шметанки
4 ложки цукру.
Так треба приготовиц:
У судзини змишац муку, соль, марґарин, вайцо лєбо жовчки и ванелийов цукер лєбо лимунову скорку и воду. Зоз миксером шицко вимишац и то перше помали, а потим 1 минуту на найшвидше. После того цесто треба мишиц з руками. Треба швидко мишиц, бо кед ше марґарин цалком розпущи, цесто ше будзе розпадовац и лїпиц и чежко з нїм робиц (вец муши през ноц одстац у фрижидеру). Цесто оформиц до лабдочкох и положиц на нїх хлєбовку лєбо превидну фолию и охабиц у фрижидеру дас пол годзини, лєбо през ноц. Потим кажду лабдочку розогнац на цо ценше.
За торточки єст купиц калупи, алє их мож печиц и у калупу за мафини. До калупу покласц паперики за мафини и у зависносци од велькосци калупу розганяц цесточка и помали их понамесцац зоз шицких бокох так же би фил нє вичурел. З єдней мири видзе 25-30 торточки, завиши од калупа.
Печиц их у релни на 180 ступнї, док од долу нє почню червенїц.
Фил ше прави так же ше увари ванелийов пудинґ так як цо пише на нїм, лєм ше место 500 мл млєка хаснує 300 мл млєка + 200 мл сладкей шметанки, цукру идзе як цо пише, дас 4 ложки.
Кед фил лїтни, з ложичку го класц до упечених цесточкох, а од горе украшиц зоз овоцу: добре ше складаю ягода и киви, ягода и боровница и рибизла, ананас и банана, лєбо друга овоц по смаку. Мож комбиновац и други смаки як цо ягода и чоколада, вишня и чоколада, пошекани орехи лєбо мандулї помишани з даяким маджуном, натарта чоколада и поламани чоколадово кекси, а сиґурно мож увариц и даяки иншаки пудинґ и по смаку го украшиц.
НАЙНОВШИ УПЕЧАТКИ