Kиноа шалата зоз рибу

Состойки за єдну особу

■ 50g киноа

■ швижа сезонска желєнява

■ єдна мархва, штреднєй велькосци

■ два ретхвочки

■ пол огурки

■ єдна парадича

■ дакус билого сира, на приклад кожи сир лєбо фета сир

■ 100 ґр осушеней риби лєбо риби зоз конзерви (филет окуреней скуши, велька конзерва тунєвини, лєбо оцадзени окурени лосос)

Пририхтованє

1. Kиноу умиц у води жє би ше одклонєло  горке пасмо.

2. Умиту киноу положиц до шерпенки и заляц зоз три раз вецей води. Можеце положиц и єдну штварцину коцки за юшку лєбо даяку другу присмачку.

3. Вариц док киноа нє напучнї и упиє шицку воду.

4. Желєняву умиц и порезац на фалатки за шалату.

5. Кед шалату рихтаце за ютре, на приклад за полудзенок на роботи, вирежце часци желєняви цо маю  вельо води (штреднї пасма огурки и парадичи зоз маґочками).

6. Причекайце же би ше киноа охладзела и помишайце состойки.

7. Присмачиц кед треба. Перше пробуйце кед сце киноу варели у юшки, можебуц то будзе цалком добре.

8. През ноц чувац у фрижидеру у завартей пластичней судзини. Ютредзень кед сцигнєце на роботу може стац и вонка на хижней температури.      

Кед же нє любице рибу, исту таку шалату мож порихтац и зоз даяким другим месом, ґриловану курчецину лєбо печену швинєцину. Тиж так  є смачна и без меса зоз варенима вайцами на приклад.

Смачного!

Mихайло Катона

(Опатрене 71 раз, нєшка 1)

НАПИШЦЕ УПЕЧАТОК

Your email address will not be published.