Запечени макарони зоз сиром и карфиолом

■ мещок макаронох

■ карфиол

■ 200 ґр трапист

сира

■ дакус сланїни, лєбо шунки

■ стари хлєб

■ векша шметанка

■ даскельо струча цеску

■ швижи присмачки – розмария, мацерова душичка, ориґано…

Гоч комбинация намирнїцох звучи можебуц покус чудно, нє одуставайце напредок од нього. Макарони зоз сиром наисце достаню цалком нови смак, а и випатрунок. Єдзце  их док су ище цепли, бо розпущени трапист сир да свой шмек, а кед ше охладза вец ше осуша, бо макарони позбераю шицко до себе.

Так треба приготовиц:

Карфиол подзелїц на менши квецики, а хто жада може охабиц и даєдно лїсце зоз главки. У сланей води обариц карфиол вєдно зоз макаронами. Кед су досц уварени одцадзиц, алє зачувац дас пол литри тей чечносци. До тепшички усипац макарони и карфиол и заляц з тоту воду цо остала од вареня. Змишац натарти сир и помали мишац же би ше розпушел, а потим умишац и шметанку, и два струча зджаменого цеску. Добре би було кед би ше тото рихтало на цеплей ринґли, же би тота вода сциха варла. Кед ше шицко зєдинї пририхтац верхнє пасмо з хторим посипеме макарони и карфиол.

Даскельо фалатки сланїни поскладаме до тепши и запечеме у горуцей релни (дас на 220 ступнї, завиши од релни). Кед є упечена, положиме ю до блендера. И ту додаме два струча зджаменого цеску, старого хлєба, и швижи присмачково трави по виборе, солї и попру и дакус маслинового олєю. Шицко зомелєме и достанєме презли у хторих помишана желєна и кафовкаста фарба. З тим посипеме макарони и печеме у релни.

З тим єдзеньом ше склада желєна шалата хтору можеме приготовиц так же ю умиєме, посолїме, додаме маслинового олєю по смаку и сусам хтори зме пред тим попражели у сухей палачинкарнї. Нєпреривно го мишаме, а чим пременї фарбу, значи же є готови.

Смачного!

Ясмина Дюранїн

(Опатрене 60 раз, нєшка 1)

НАПИШЦЕ УПЕЧАТОК

Your email address will not be published.